Exo 7 | BNP | STEP | Muri e BAKOVI DAGI i takia e Moses, “O masia, iau a rata ioe, o manga a Vure na matane Parao. E tukamu e Aron i manga a propet vomu ge habi a ngava vomu ne Parao.

Exodus 7

A Vure i Vakuku e Moses e Aron

1 Muri e BAKOVI DAGI i takia e Moses, “O masia, iau a rata ioe, o manga a Vure na matane Parao. E tukamu e Aron i manga a propet vomu ge habi a ngava vomu ne Parao. 2 O taki e Aron vona a maka ngava a taki vomu. Muri ge takia e Parao ge longo vona e huriki a Israel ri gi mariu tala na robo vona. 3 ^aPali iau ga ratea a hatene Parao ge madihi, muri ga rata a maka nivakasiri o Egipto. 4 E Parao i uka ma ge longototo a ngavamu, bara ratapilea e Egipto, ga pelekado ga vakamadihi e huriki a tahotanga, ga vakamariu e huriki a viri nau, re huriki a Israel. 5 Na tahuna ga ratapile e huriki a Egipto, bara vakamariu e huriki a Israel. E huriki a Egipto bara ri matakilaka nau, iau kunana e BAKOVI DAGI.”

6 E Moses e Aron ru ramai lobo a ngava e BAKOVI DAGI i taki. 7 Na tahuna ru ta turane Parao, e Moses i tahoka a pida i ravulu polotolu (80), e Aron i tahoka a pida i ravulu polotolu a polona i tolu (83).

A Kodo ne Aron i Vulo a Mata

8 E BAKOVI DAGI i taki e Moses e Aron, 9 “Na tahuna e Parao ge taki marua, muru gu rata a nivakasiri, muru vakasiria vona iau a rudu marua. Ioe o Moses, o takia e Aron ge bolea a kodo vona, ge voro purua na malala, ge vulo a mata.”

10 Muri e Moses e Aron ru lakea ne Parao ru vakalongoa vona a ngava ne BAKOVI DAGI i taki. E Aron i voro purua a kodo vona na matane Parao, na matane huriki a bolekori, i vulo a mata. 11 Muri e Parao i gale palupu e huriki a bakovi na lohokanga, a bakovi na malulu o Egipto, ri toni ni ratea a maki iea na malulu ne ria. 12 Lakea ri voro puru a maka kodo ne ria ri vulo a mata. Pali a kodo ne Aron i todo a maka kodo ne ria. 13 E Parao i masia a nivakasiri, pali i gigitora, i uka ma i longo mai a nitane Moses e Aron, i manga a ngava e BAKOVI DAGI i taki.

A Mugana Vuranga

A Naru i Mapulo i Manga a Dara

14 Muri e BAKOVI DAGI i takia e Moses, “E Parao i gigitora hateka, i marikoi ne huriki a Israel ri gi vano. 15 Na hatelanga bara i lakea na naru dagi e Nail. O vano o bulo ia vonga. O bolea a kodo vomu ra i vulo a mata, o davea na gagana naru dagi. 16 O takia e Parao, o ta maea ‘E BAKOVI DAGI, a Vure ne huriki a Hibru, i rudu iau ga taki ioe, o longo vona e huriki a Hibru ri gi vano, ri gi kavurikea na tabeke i ngeki. Pali i valai i harena mona i uka ma o longo mai ria. 17 ^bNgane e BAKOVI DAGI i ta maea, “Ioe bara o masia a maki ga ratea, bara o lohoka vona iau kunana e BAKOVI DAGI. O masia, bara lagua na kodo nau a naru dagi e Nail, bara i vulo a dara. 18 Muri a maka manu na naru dagi bara ri mate, ri mavuru. E huriki a Egipto i uka ma ri gi nua.” ’ ”

19 E BAKOVI DAGI i takia e Moses, “O takia e Aron ge bolea a kodo vona ge toto langa na maka naru dagi, na naru kiroko, na hini ni keli kudu i tua vona a naru, na lomu, na darilomu ne Egipto, bara ri mapulo a dara. A dara bara i tabuli na hini lobo o Egipto. A naru ri kiru na tavila na buroi, ngi ranga bara i vona a dara.”

20 Lakea e Moses e Aron ru rata a maki e BAKOVI DAGI i taki rua vona. Na matane Parao, na matane huriki a bolekori vona, e Aron i bolea a kodo i lagua a naru dagi e Nail, i vulo a dara. 21 A maka manu ri mate ri mavuru, i uka ma ni ninu a naru. A dara i bele na tabeke lobo ne Egipto. 22 E huriki a bakovi na malulu o Egipto ria ranga ri rata ra naro i ratea e Aron. Lakea e Parao i gigitora, i uka ma i longototo e Moses e Aron. I tababana ni hehe, i manga a ngava e BAKOVI DAGI i taki mugea. 23 E Parao i hamule na ruma-hariki vona, i uka ma i mangenge vona a maki i bele. 24 Muri e huriki a Egipto ri keli a maka lovo na gagane Nail ri kiru, a vuhuna ri keri ni ninu na naru dagi. 25 A dara i kavitagu mavongea e Nail na parava i polorua muri ne BAKOVI DAGI i puloa a naru i manga a dara.